24 наурыз – Дүниежүзілік туберкулезге қарсы күрес күніне арналған айлық аясында Солтүстік Қазақстан облысының Шал ақын ауданында мектептердің мейірбикелері мен ауылдық округтердің фельдшерлері оқушылар арасында туберкулездің алдын алу мәселелері бойынша әңгімелер мен түсіндіру іс-шараларын ұйымдастырды.
Кездесу барысында оқушыларға инфекцияның берілу жолдары, аурудың негізгі белгілері, алдын алу шаралары, сондай-ақ уақтылы тексеруден өтудің маңыздылығы туралы айтылды. Өз денсаулығына жауапкершілікпен қарауды қалыптастыруға және салауатты өмір салтын ұстануға ерекше назар аударылды.
Мұндай іс-шаралар жас ұрпақтың туберкулез туралы хабардарлығын арттыруға ықпал етеді, алдын алу дағдыларын қалыптастыруға көмектеседі және ауруды ерте анықтаудың маңыздылығын еске салады. Балалар мен жасөспірімдер арасындағы ақпараттық-ағарту жұмысы туберкулезбен күресудің маңызды бөлігі болып табылады және халықтың денсаулығын сақтауға бағытталған.
