«Жалпыұлттық социал-демократиялық партия» филиалының бастамасымен іс-шаралар жоспарын орындау аясында Солтүстік Қазақстан облыстық Қазақстан халқы Ассамблеясында 7 сәуір – Дүниежүзілік денсаулық күніне арналған дөңгелек үстел өтті. Кездесу тақырыбы: «Петропавлда денсаулық сақтаудың қолжетімділігі: проблемалар, шешімдер, серіктестік».
Дөңгелек үстел жұмысына СҚО Денсаулық сақтау басқармасының, медициналық әлеуметтік сақтандыру қорының, қаланың медициналық ұйымдарының өкілдері қатысты.
Солтүстік Қазақстан облысының фтизиопульмонология облыстық орталығынан фтизиатр-дәрігер Д.Ж. Карменова баяндама жасап, халыққа туберкулезге қарсы көмек көрсетудің, диагностика мен емдеудің қолжетімділігінің, сондай-ақ ведомствоаралық өзара іс-қимылдың өзекті мәселелерін атап өтті.
Талқылау барысында қатысушылар бірқатар маңызды тақырыптарды қозғады:
- халықтың әртүрлі санаттары үшін медициналық көмектің қолжетімділігі мен сапасы;
- міндетті әлеуметтік медициналық сақтандыру жүйесін қаржыландыру және оның тиімділігі мәселелері;
- медициналық ұйымдарды кадрлармен қамтамасыз ету;
- денсаулық сақтауды цифрландыру және заманауи сервистерді енгізу;
- мемлекеттік құрылымдар, медициналық ұйымдар мен қоғамдық бірлестіктер арасындағы әріптестікті нығайту.
Кездесу қорытындысы бойынша қатысушылар халыққа медициналық көмектің қолжетімділігі мен сапасын арттыру үшін барлық мүдделі тараптардың күш-жігерін шоғырландырудың, сондай-ақ өңірдің денсаулық сақтау жүйесін нығайтуға бағытталған бірлескен шешімдерді әзірлеудің маңыздылығын атап өтті.
